SABASABA YAIFUNGULIA RADIANT AFRICA FURSA YA KUJITAMBULISHA, YAHIMIZA WATANZANIA KUJENGA UTAMADUNI WA UWEKEZAJI
Dar es Salaam – Kampuni ya Radiant Africa imesema ushiriki wake wa kwanza katika Maonesho ya 50 ya Biashara ya Kimataifa ya Dar es Salaam (Sabasaba) umeiwezesha kujitangaza kwa wananchi wengi, kupata wateja wapya na kuhamasisha Watanzania kujenga utamaduni wa uwekezaji, kuweka akiba na kukuza uwezo binafsi.
Akizungumza baada ya kushiriki maonesho hayo, Mkurugenzi wa kampuni hiyo, Murtaza Adamjee, alisema kampuni yake inalenga kuwasaidia watu kufungua uwezo wao kupitia mafunzo ya maendeleo binafsi, biashara na uwekezaji ili kuongeza kipato na kujenga uchumi imara.
Alisema kampuni hiyo pia ni mtoa huduma aliyesajiliwa wa ushauri wa uwekezaji (Investment Service Provider), hivyo hutoa ushauri unaowawezesha wananchi kufanya maamuzi sahihi ya uwekezaji na biashara.
"Kushiriki Sabasaba kwa mara ya kwanza kumetupa fursa ya kukutana na watu wengi ambao hawakuwa wanatufahamu. Tumeeleza huduma zetu, tumepata mrejesho kutoka kwa wananchi na sasa watu wengi wanatambua tunachofanya," alisema.
Aliongeza kuwa maonesho hayo hayakuwa na manufaa kwa kampuni yake pekee, bali pia yalimpa nafasi ya kujifunza kuhusu huduma na fursa zinazotolewa na taasisi mbalimbali za Serikali katika maeneo ya uwekezaji, viwanda, biashara na uwezeshaji wa wananchi kiuchumi.
Muhtasari alimpongeza Rais Dkt. Samia Suluhu Hassan kwa kuendelea kuimarisha mazingira yanayowezesha wananchi kupata elimu, ujuzi na fursa za kiuchumi kupitia maonesho ya Sabasaba.
Alisema wananchi wanapaswa kutumia maonesho hayo kujifunza mifumo mbalimbali ya Serikali na sekta binafsi inayoweza kuwasaidia kuongeza kipato na kuboresha maisha yao.
Aidha, aliwahimiza watu kuwekeza katika kujiongezea maarifa, ujuzi na kujenga mahusiano bora, akisema maendeleo huanza na mtu binafsi anayekuwa tayari kujifunza na kutoka katika eneo la mazoea (comfort zone).
Kwa upande wake, aliwataka wafanyabiashara na taasisi mbalimbali kushiriki maonesho ya Sabasaba, akieleza kuwa ni jukwaa muhimu la kutangaza huduma, kukutana na wateja wapya na kujenga ushirikiano wa kibiashara.
"Ukishiriki maonesho kama haya, watu wengi wanapata nafasi ya kukufahamu na kuelewa huduma unazotoa. Kama hujitokezi, ni vigumu watu kujua kuwa upo na unatoa huduma hizo," alisema.
