Breaking News

KUSA YAFANYA KONGAMANO LA KWANZA LA AFYA YA AKILI KWA VIJANA - KAIRUKI

February 12, 2026

Dar es salaam - Chama cha Wanafunzi wa Chuo Kikuu cha Kairuki (KUSA) tarehe 07 Februari 2026 kimefanya Kongamano la Kwanza la Afya ya Akili kwa Vijana, lililofanyika katika ukumbi wa Chuo Kikuu cha Kairuki, chini ya kaulimbiu isemayo “Kuchunguza Changamoto za Afya ya Akili kwa Vijana.”

Kongamano hilo lilikuwa jukwaa muhimu na lenye tija kwa ajili ya majadiliano ya wazi, kujifunza pamoja na kutafakari kuhusu masuala ya afya ya akili miongoni mwa vijana. Zaidi ya washiriki 100 walihudhuria tukio hilo, wakiwemo wanafunzi wa vyuo vikuu, viongozi wa vijana, wataalamu wa afya, wahadhiri pamoja na wanaharakati wa afya ya akili.
Katika kongamano hilo, mada mbalimbali zilijadiliwa kwa kina, zikiwemo msongo wa mawazo unaotokana na masomo na uchovu wa kiakili (burnout), ustahimilivu wa kihisia na akili ya kijamii, pamoja na athari za majeraha ya kihisia kwa vijana. Washiriki walipata fursa ya kujifunza mikakati ya vitendo ya kukabiliana na changamoto hizo, ikiwemo mbinu za kudhibiti msongo wa mawazo, kujitambua, kudhibiti hisia na umuhimu wa kutafuta msaada pale inapohitajika.

Akizungumza katika kongamano hilo Profesa Gadi Kilonzo, amesema changamoto ya afya ya akili nchini ni kutokana na tulikotoka, tulipo sasa na mwelekeo wa baadaye. Aidha, alizungumzia magonjwa mbalimbali ya akili katika taaluma ya magonjwa ya akili (psychiatry), mzigo wa matatizo ya afya ya akili na athari zake kuanzia ngazi ya mtu binafsi hadi taifa kwa ujumla, jambo lililoweka msingi imara wa mjadala katika kongamano hilo.
Vikao vya majadiliano ya jopo na vipindi shirikishi vilitoa nafasi kwa washiriki kuuliza maswali, kushiriki uzoefu wao na kujifunza mbinu mbalimbali za kujenga ustahimilivu na kuimarisha afya ya akili.

KUSA imetoa shukrani za dhati kwa Uongozi wa Chuo Kikuu cha Kairuki kwa msaada wao katika kufanikisha kongamano hilo. Pia imetambua mchango mkubwa wa wadau wao, Akili Platform Tanzania, kwa ushirikiano wao muhimu. Shukrani za pekee zimetolewa kwa wazungumzaji, wawezeshaji, wasimamizi wa mijadala, wageni waalikwa na washiriki wote kwa ushiriki wao hai na mchango wao.
Kongamano hilo limeonesha umuhimu wa kuendelea kuunda mazingira salama kwa vijana kujadili masuala ya afya ya akili, kupunguza unyanyapaa unaohusiana na matatizo ya akili, na kuimarisha mifumo ya msaada kwa wanafunzi chuoni.

KUSA imesisitiza kuwa itaendelea kuwa mstari wa mbele katika kuhamasisha na kutetea afya ya akili ya wanafunzi hata baada ya kongamano hilo, kwa lengo la kukuza ustawi wa vijana ndani na nje ya chuo.